Äntlich wieder Summer.

So sind eusi Lieblings Fustballer vom TV Bauma id Summersaison 2022 gstarted.

Nach ere lange Winterzit händ sich all gfreut wieder mal verrusse z trainiere und sich ufd Saison vor z bereite.

D Fustballer sind wie au scho letst Jahr mit zwei Mannschafte am Start gsi. De Ersti vo drü Spieltäg hät derfe mit schönem Wätter bestritte werde. Bauma 2 hät am Morge de start in Oberwinterthur gmacht und det chöne 6 gueti Pünkt uf Bauma hole. Am Nammitag sinds dän vo Bauma 1 abglöst worde. S eis isch mit gwüsse Startschwirigkeite gstarted, hät aber schlussändlich drü Pünkt uf ihrem Konto chöne verbueche.

De zweiti Spieltag isch ähndlich verloffe. Das mal jedoch in Seuzach.

Beidi Mannschafte händ sich det drü Pünkt chöne verdiene.

S grosse Heileit isch dän natürli de letsti Spieltag gsi, wo s erst mal i de Gschicht vom Fustball Bauma im eigene Dorf duregfüert worde isch.

Dank de tatchräfige Understützig vo de andere Vereinsrigene, wo de ganzi Barbetrib organisiert und underhalte händ, ischs en glungene Tag worde. 11 Manschafte händ sich für dä Ahlass in Bauma ihgfunde. Pünktlich uf s erste spiel TV Bauma 1 vs Illnau hät sich s Wätter besseret. Bauma hät das Spiel erfolgrich für sich chöne entscheide. S zweite Spiel hät Bauma zwei bestritte ebäfals gäge Illnau. Au sie händ det chöne drü Pünkt günne. Als drits isch dän us Bauma sicht s grosse Final ahgstande TV Bauma 1 gäge TV Bauma 2. Die beide Mannschafte händ sich nüt gschänkt und all händ folle Ihsatz zeigt.

Nach eme chopf ah chopf räne hät schluss ändlich Bauma 1 dä Kampf gunne.

Ahschlüssen isch für sie d Saison verbi gsi und während die andere Mannschafte ihri Kämpf ustreit händ, hät TV Bauma 1 und 2 bereits chöne uf e tolli Saison ahstosse und de restlich Tag gnüsse.

Für de Fustball TV Bauma
Flavio Grotz